想放錶既人，平時最多問二手錶店既問題應該會係：「隻錶收幾錢？」「隻錶收幾折？」每個人心目中都有一個價，而心入面個價往往又會同市場價格有出入。除左自己對隻錶既主觀感情之外，二手錶價格都會取決於幾個客觀標準。不如我地就一齊黎睇下，會影響二手錶價既幾個主要因素。
全套 Full set
首先當然係全套，俗稱 full set，最能夠提升二手錶收錶價格。試想想，兩隻相同既二手錶，有齊包裝與淨錶兩錶比較之下你會揀邊隻？自然係前者更受歡迎。原廠盒、保卡、說明書、發票、鏡面膠膜、吊牌等等，尤其是保卡，一定要好好保存，佢係你隻撈既身份證，遺失冇得補發的，如果連錶格亦齊就最好不過。
保養、新舊程度
隻錶新淨D，少D刮花，少D瑕疵，機芯正常，又喺保修期之內，或者係全新未用品(NOS)又再高D。
市場流通性
唔同既品牌、款式、材質、功能，就有唔同數量既擁躉，加上唔同品牌對自己出產既錶款進行量產或者已經停產，當造成一錶難求既局面而又多人搵，容易賣出去，二手錶價自然會高。例如勞力士地通拿(Rolex Daytona)或水鬼(Rolex Submariner)系列呢類熱門運動型時款腕錶有大量擁躉，回收價格會比一般更高。